महाराष्ट्रातील कोंकण हा गिरी शिखरांच्या दुर्गम ग्रामीण प्रांत. गरीबी, अशिक्षितता, अज्ञान, अंधश्रद्धा यांनी ग्रासलेला प्रदेश. अशा बिकट भौगोलिक व आर्थिक दृष्ट्या मागासलेल्या भागात तळागाळातील सामान्य गरीब शेतकऱ्यांच्या मुलांच्या शिक्षणाची ज्ञानगंगा पोहचविणारे भगीरथ म्हणजेच स्व. गोविंदरावजी निकम. त्यासाठी त्यांनी त्यांच्या वयाच्या २० व्या वर्षांपासून अंतिम श्वासापर्यंत कार्य जोपासले. १९५७ साली सह्याद्री शिक्षण संस्थेची स्थापना करून सावर्डे येथे पहिले माध्यमिक विद्यालय सुरु केले. आज या संस्थेची ३३ माध्यमिक विद्यालये, २ मराठी माध्यमाच्या प्राथमिक शाळा, ५ उच्च माध्यमिक विद्यालये, त्याचबरोबर व्यावसायिक शिक्षण देणाऱ्या १८ शाखा आहेत. फक्त कोकणातीलच नव्हे तर संपूर्ण महाराष्ट्र किंबहुना परराज्यातील हजारो विद्यार्थी ज्ञानार्जन करून नोकरी बरोबरच विविध व्यवसायात कार्यरत आहेत. ज्ञानावरील अमाधश्रद्धा, ध्येय, चिकाटी व अथक परिश्रम या चार सूत्रीच्या बळावर स्व. निकम साहेब शिक्षण क्षेत्रातील शिक्षणमहर्षी तसेच सहकार क्षेत्रातील सहकारमहर्षी म्हणून ओळखले जाते . स्व. निकम साहेबांचे सुपुत्र संस्थेचे कार्याध्यक्ष श्री.शेखर निकम हे संस्थेची धुरा यशस्वीपणे सांभाळत आहेत. सह्याद्रि शिक्षण संस्थेच्या देदीप्यमान वाटचालीत आदरणीय शरदचंद्रजी पवार साहेब यांचे मौलिक मार्गदर्शन व आशीर्वादाबरोबरच आदरणीय अजितदादा पवार यांचे मौलिक मार्गदर्शन व सहकार्य लाभले आहे.